Sheikh Cabdirahiim Cali Xaaji jaabiri oo Hambalyo U Diray Muslimiinta Kuna Baaqay Kordhinta Sadaqada Ramadaanka

Caawa oo ah habeenka koowaad ee bisha barakaysan ee Ramadaan, waxaa jawi farxad iyo raynrayn leh ku qaabilay dhammaan muxsiniinta iyo jaaliyadda Soomaaliyeed ee ku dhaqan magaalada London. Waa bil kheyr, barako iyo naxariis sidata; waa bil qalbiyada la nadiifiyo, ducada la aqbalo, dambigana la dhaafo. Ramadaanku waa hadiyadda ugu qaalisan ee Eebbe siiyo addoomihiisa, waana fursad dahabi ah oo lagu kasbado ajar aan la koobi karin.

Hambalyo iyo bogaadin diirran ayaa loo dirayaa guud ahaan ummadda Muslimiinta, gaar ahaan ummadda Soomaaliyeed meel kasta oo ay joogaan. Si gaar ah, waxaa munaasabaddan qiimaha badan hambalyo uga diraya Muslimiinta Sheikh Cabdirahiim Cali Xaaji jaabiri, oo ah Maamulaha Guud ee Hay’adda Alithaar, isaga oo ku hadlaya magaca hoggaanka iyo dhammaan shaqaalaha hay’adda.

Shiiqu wuxuu tilmaamay in Ramadaanku yahay bil lagu tartamo camalka wanaagsan; bil lagu xoojiyo salaadda, soonka, akhrinta Qur’aanka, iyo ducada. Wuxuu Muslimiinta ugu baaqay inay si dhab ah uga faa’iideystaan maalmaha iyo habeenada barakaysan, maadaama ay tahay bil aan la hubin in qof walba mar kale gaari doono. Wuxuu carrabka ku adkeeyay in qalbiyada la isu furo, la isu naxariisto, lana xoojiyo walaaltinimada iyo is-garabsiga.

Sidoo kale, Sheikha wuxuu ku boorriyay muxsiniinta inay labanlaabaan sadaqooyinka, gaar ahaan xilligan adag ee ay jiraan qoysas badan oo aan awoodin inay helaan afur ku filan. Wuxuu xusay in ajarka sadaqada Ramadaanka uu ka weyn yahay waqtiyada kale, isla markaana qofka wax bixiya uu ka mid noqonayo kuwa Alle ku hoos galin doono naxariistiisa maalinta qiyaame.

Hay’adda Alithaar, oo ah hay’ad madax-bannaan oo ku tiirsan kaalmooyinka muxsiniinta, ayaa mar walba u taagan daryeelka iyo garab istaagga masaakiinta, agoonta iyo qoysaska nugul. Inta lagu guda jiro bishan barakaysan, hay’addu waxay laba jibbaaraysaa dadaalkeeda ku aaddan gaarsiinta afur, raashin iyo kaalmooyin kala duwan oo lagu yareynayo baahida jirta. Tani waa mid ka tarjumaysa masuuliyadda diineed iyo mid bulsho ee saaran qof kasta oo awood leh.

Gunaanadkii, Sheikh Cabdirahiim Cali Xaaji Jaabiri wuxuu Muslimiinta kula dardaarmay inay Ramadaanka ka dhigaan mid isbeddel dhab ah ku reeba noloshooda; inay ka toobad keenaan khaladaadkii hore, kuna dadaalaan camal suuban oo joogto noqda xitaa marka bisha barakaysan dhammaato. Wuxuu Alle uga baryay in uu ka aqbalo soonka, salaadda iyo sadaqooyinka Muslimiinta, kana yeelo kuwa ka mid noqda kuwa la xoreeyo habeenada Ramadaan.

Hambalyo mar kale dhammaan muxsiniinta iyo ummadda Soomaaliyeed ee ku nool London iyo daafaha dunida. Ilaahay ha inaga yeelo kuwii ka faa’iideysta bishan kheyrka badan, hana nagu gaarsiiyo ciiddii annagoo nabad iyo caafimaad qaba.

This report was written by Said Adam Hassan, Editor of Alithaar Charity.